José Luis Campal gana, cola obra "Corcholis", el I Concurso de Poesía Visual de CVNE

La obra "Corcholis", de José Luis Campal, foi la ganadora del I Concurso de Poesía Visual na Aldea del Vino, baxu'l tema "El Vino. La Rioja. España", entamáu por bodegues CVNE, d'Haro, col motivu del so 130º aniversariu. Según informó la bodega nuna nota, el xuráu, por unanimidá, destacó l'eleváu nivel de suxerencia de la obra ganadora y la incorporación al testu de figures retóriques propies de la poesía visual.

La poesía visual ye un tipu de poesía esperimental na que la imaxe y l'elementu plásticu, en toles sos facetes, técniques y soportes, predomina sobre'l restu de los componentes. El premiu del públicu recayó na obra "Los Mundos del Vino", de Manuela Martínez Romero. Les obres van tar espuestes na Aldea del Vino de la bodega d'Haro de CVNE hasta'l 27 de xuliu.
Imprimir

Xosé Nel Riesgo gana'l concursu Fernández Lema de narrativa

L'escritor avilesín y miembru de la directiva de l'Asociación Cultural l'Arribada, Xosé Nel Riesgo, ye'l ganador de la presente edición del concursu de relatos que convoca añalmente la Fundación Fernández Lema de L.luarca. El premiu, que ye unu de los más prestixosos de narrativa en llingua asturiana y cuenta con una dotación de 3.500 euros, tuvo como ganadores nes pasaes ediciones a Xuan Xosé Sánchez Vicente y Esther García . Xosé Nel Riesgo gana esti premiu col relatu "Regresu ensin fin", del que'l xuráu valoró'l so calter realista, con un tresfondu social que recueye la problemática del alcoholismu y los malos tratos, amás de la so axilidá narrativa. Xosé Nel Riesgo, que tien escrito ente más otres obres les noveles "El cai nunca duerme" (ALLA, 1989), "Parque temáticu" (Trabe, 2005) y "Escrito na ceniza" (ALLA, 2007), dará a conocer el relatu ganador del Fernández Lema nel marcu de l'Arribada 2009.

Imprimir

L'Arribada 2009 abellugará a un esposición sobre l'actor y barítonu xixonés Antonio Medio

A partir del 14 de setiembre va allugase nel patiu del Centru de Cultura Antiguu Institutu, en dientro de l'Arribada 2009, una esposición sobre l'actor y barítonu asturianu Antonio Medio. L'amuesa constará de 14 paneles esplicativos de la vida y obra d'esti artista, que grabó numberosos discos de zarzueles d'éxitu como les "Campanas de Madrid", con música del maestru Jesús Romo, y que trabayó nes compañíes de Celia Gámez o Cifesa, entre otres. Pal "Barítono de la Voz de Hierro", sobrenome col que se conocía a Antonio Medio en toa España, escribieron autores como Fernández Shaw, Felipe Seoane, Serano Anguita, Carreño, Lozano y maestros como Romo, Alons, Guerrero , o Sorozabal. Grabó nun discu, xunto con Matías Prats padre, la famosa 'polémica' Andalucía y Asturias, de Diego Terrero y Teodoro Cuesta. Foi, amás, el creador de la Compañía de Arte Asturiano, uno de los intentos más serios de profesionalización, arriesgaos y con meyores resultaos escénicos de la llarga historia del teatru costumbrista asturianu. Esta esposición sobre Antonio Medio permanecerá abierta hasta'l 30 de setiembre.
Imprimir