Gonzali Producciones dobla al asturianu ‘McLintock’, un western de John Wayne

Poster de la versión asturiana de McLintock

FONTE: Gonzali Producciones

Pa la selmana viniente Gonzali Producciones va entamar el doblaxe d’otru llargumetraxe al asturianu. Trátase del perconocíu western McLintock, rodáu nel añu 1963 nos Estaos Xuníos y dirixíu pol cineasta Andrew V. McLaglen. El film ta protagonizáu polos actores John Wayne y Maureen O’hara. El guión basóse parcialmente na obra de William Shakespeare The Taming o the Shrew.

Pa esti trabayu la productora organizará un grupu profesionales integráu por 30 persones, ente técnicos y dobladores. El doblaxe y acabáu técnicu de la película fadráse nel estudiu Fase Cuatro de Gijón/Xixón, onde yá se ficieren les versiones asturianes de los clásicos Los viaxes de Gulliver y El tercer home.

La productora cunta estrenar la versión de McLintock na edición de L’Arribada d’esti añu.

ARGUMENTU:

George Washington McLintock (John Wayne), respetáu y queríu ciudadanu d’un pueblu d’Arizona, ye un ganaderu terrateniente que s’alluga ancláu nunos caducos principios afitaos na rudeza y el machismu. Ye pola mor d’ello, y poles sospeches d’infidelidá, que la so muyer Katherine (Maureen O’Hara) decidiera abandonalu va años. Por embargu, el regresu a casa de la fía en común, cola nueva de que ta prometica, fadrá que la ex pareya se vea otra vuelta pa decidir el so futuru. Dende esti momentu, sucederánse les engarradielles ente ellos, lo que provocará situaciones cómiques, agravaes pola contratación d’una moza y guapa cocinera na facienda. Amás, l’actual gobernador enseñará una malsana envidia hacia la posición de reconocimientu del pueblu pa con McLintock, y tratará de contino de desprestixalu.

REPARTU:

▪ John Wayne: George Washington McLintock

▪ Maureen O’Hara: Katherine Gilhooley McLintock

▪ Patrick Wayne: Devlin Warren

▪ Stefanie Powers: Becky McLintock

▪ Jack Kruschen: Jake Birnbaum

▪ Chill Wills: Drago

▪ Yvonne De Carlo: señora Louise Warren

▪ Jerry Van Dyke: Matt Douglas Jr

▪ Edgar Buchanan: Bunny Dull

▪ Bruce Cabot: Ben Sage

▪ Perry Lopez: Davey Elk

▪ Strother Martin: Agard

▪ Gordon Jones: Matt Douglas

▪ Robert Lowery: Gobernador Cuthbert H. Humphrey

▪ Hank Worden: Curly Fletcher

LOS ACTORES DE DOBLAXE:

El númberu de dobladores que trabayarán nel versionáu de la película sedrá’l de 20, coordinaos pol actor y director de dobladores Antón Caamaño.