ARRIBADA 2011: La Rolda acueye na segunda metada de setiembre una nueva esposición coles semeyes del concursu fotográficu de Tierra Astur

Cartelu del concursu

Dientro de L'Arribada 2011, na so estaya Rolda, el viniente 16 de setiembre, nel xixonés Atenéu de La Calzada, inauguraráse la esposición Buelga Astur, formada poles venticinco semeyes que resultaren finalistes nel IV Concursu fotográficu qu'entama Tierra Astur. Les obres, de temática asturiana y especialmente venceyada a la cultura tradicional y al paisaxe, presenten un nivel peraltu, indicando la notoria conocencia que d'Asturies tienen los autores. Amás, nel marcu de l'Arribada, améstase una esbilla poético con versos escoyíos d'ente los poemarios d'un piñu poetes, que son de los más destacaos del país. Asina, cada semeya va tar acompañada d'un poema, amestando d'esti mou la llírica a la imaxe, como yá se fixera nos años 2009 y 2010. La esposición podrá visitase hasta'l 30 de setiembre.