El 3 de xunu va presentase en Xixón 'Toma de tierra', la más completa de les antoloxíes de poetes en llingua asturiana

Güei entama la distribución de Toma de tierra. Poetas en lengua asturiana. Antología [1975-2010]. Esta obra, publicada por Ediciones Trea, recueye la esbilla más completa, hasta la fecha, de poetes integrantes del nomáu Surdimientu. Asoléyense diez poemes, n'asturianu cabo la so traducción al castellanu, de cada autor. El llibru cunta con una amplia introducción ellaborada pol escritor y periodista José Luis Argüelles, que foi amás l'antólogu d'esta obra. Consta de 768 páxines y tien un preciu de 35 euros.

Toma de Tierra va presentase'l viniente 3 de xunu, nun actu qu'emprimará a les 19:30 hores nel Centru de Cultura Antiguu Institutu de Xixón.

Los poetes presentes nesta antoloxía son, per orden de nacencia, Pablo Ardisana, Nel Amaro, Xosé Bolado, Manuel Asur, Lluis Xabel Álvarez, Xosé Manuel Valdés, Xuan Xosé Sánchez Vicente, María Teresa González, Roberto González-Quevedo, Taresa Fernández Lorences, Miguel Rojo, Ánxel Álvarez Llano, Luis Salas Riaño, Antón García , Esther Prieto, Lourdes Álvarez , Miguel Allende, Xosé Antón García, Ignaciu Llope, Lluis Fano, Humberto Gonzali, Berta Piñán, Xulio Vixil, Aurelio González Ovies, Xuan Bello, Xilberto Llano, Marta Mori, Pablo Antón Marín Estrada, Xabiero Cayarga, Xuan Santori, Xulio Viejo, Chechu García, Xandru Fernández , Elías Veiga, José Luis Rendueles, Martín López-Vega, Pablo Texón, Héctor Pérez Iglesias y Ana Vanessa Gutiérrez.

Imprimir

Conferencia de José Luis Campal sobro José León Delestal

Güei, a les 19:30 hores, l'escritor, investigador y miembru del RIDEA, José Luis Campal, pronunciará una conferencia sobro la novela póstuma de José León Delestal, Suso y la música. L'actu fadráse na Casa de los Alberti, en Ciañu (Llangréu).
Imprimir

El siguiente actu de la Rolda 2010 incluyirá la proyección del documental 'Así es Asturias' (1.962), de Juan Antonio Cabezas

L'actu siguiente de la estaya de L'Arribada Rolda 2010, que tendrá por títulu 'Asturies años 60, un tiempu de cambios', cuntará na so primera parte cola proyección de la película Así es Asturias.

Trátase d'un documental del añu 1.962, rodáu en 35 milímetros, n'Eastmancolor, fechu con una técnica directa y de grandes panorámiques. Como fondu musical tien distintos temes del folklore astur, parte d'ellos interpretaos pol grupu de dances del Centru Asturianu de Madrí.

Dirixólu l'escritor y periodista Juan Antonio Cabezas, que tamién ye l'autor del guión. La voz de la narración ye del famosu actor de doblaxe Simón Ramírez . Basilisa Soriano fuera la montadora, y Juan Jurado'l director de fotografía.

Esta obra, de 63 minutos de duración, estrenóse en Madrí un 21 d'ochobre de 1.963, nel Cine Rex. Tamién ye destacable que'l documental Así es Asturias contenga la única filmación conservada de la pernomada osa Petra.
Imprimir

Xosé Antonio García y el doloríu sentir

Humberto Gonzali.

Si pa saber d’un home, ente la estremadura de la so individualidá y de la historia perdida nel trescursu del mundu, afayamos la intensidá del so facer y l’ámbitu onde s’allugó, sedrémos pa llegar a la xusta comprensión del so ser. Y cuando la herencia qu’aportó durante la esistencia terrena ye intensa abondo como pa modelar xiros propios nel devenir de la cultura, podemos dicir que’l mensaxe de la so humanidá tien un futuru en forma de veneru incandescente. Poques vueltes la vida fuera pa da-y a Xosé Antonio García momentos felices, pero sí que-y apurrió los sentimientos complexos que guañaron nos sos poemes.
El so gustu pol afondamientu nel llatín, griegu y árabe clásicos, de la qu’estudiaba Filoloxía Románica ya Hispánica, facilitó-y un conocimientu de primera mano d’una bayura obres enxertaes nes más granibles tradiciones de la lliteratura mundial, afayando de resultes d’ello un bagaxe cultural que pocos lliteratos n’asturianu teníen daquella y que, digámoslo tamién, d’entós p’acá pocos más se punxeren a la xera de tenelu. Y asina, cuando se publicara l’escelente Cuartetu de la Criación, de la man del Ayuntamientu de Mieres, dalgunos nun nos sorprendimos. Xosé Antonio yá anunciare, nes revistes “El cuélebre literario” y “Malku”, esi camín bayurosu, clasicista, frutu de la propia y dura esperiencia y d’un legáu tan vixente y presente como l’aire o l’augua. Esi llibru yera poesía xurdiendo a golfaraes, con una vitalidá reivindicativa de la esperanza, por más que los sos paisaxes enxertaos ente l’amor y el duelgu trescurríen davezu pelos silencios que la dulda xeneraba.
Xosé Antonio García y la so poesía yeren fíos d’un llugar y d’un tiempu, del Mieres d’aquel entós y d’unes décades onde’l particular mundu marcáu a la vera del Caudal (el Ríu Grande de los antiguos) produció nomes importantes pa la cultura d’esta Asturies de nós. Él fue pa danos una imaxe rigurosa de la humanidá y les munches contradiciones que la puen conformar, ensin deformaciones infecundes nin artificios vacios. Xuntó con metáfores directes y pensamientos del más llográu llirismu la escuridá qu’añera nos requexos del alma y la premonición del desaniciu. Dempués del so segundu poemariu, Alcordances d’un home muertu, Xosé Antonio García morrería físicamente pero diba camudar a residente nesa eternidá primixenia qu’amarra a los asturianos contra la tierra que nos perpetúa.
Cuando pienso en Xosé Antonio alcuérdome siempres d’una llarga conversa nocherniega que caltuviéremos, sofitaos na barra d’un pub, sobre’l platonismu na poética de Garcilaso de la Vega y la capacidá del clásicu pa describir la señardá que la mesma esistencia produz. Diéremos-y vueltes y vueltes a los versos que decíen no me podrán quitar el dolorido sentir, si ya primero no me quitan el sentido, y el casu ye que nun pudimos da-y acabu satisfactoriu a los argumentos qu’ellí nacíen. Emplazáramonos pa otra nueche, na mesma barra de pub, pero’l destín nun lo quixo permitir. Más pudo la muerte y, demientres díbemos pa contra’l nuevu sieglu, paecía que tres d’ella diba venir l’olvidu. Nun sé, o quiciás sí, por qué pasamos tantos años ensin perconocer la relevancia de Xosé Antonio pa la nuestra lliteratura, por qué al tiempu que se lloaba a lo bono, pero tamién a lo espantible como si fuera tamién bono, escaecíemos la so esistencialista voz. Felicitémosnos pol actu de xusticia que supón la dedicatoria de la Selmana de les Lletres a la so persona y a la so obra. Pero cuando ésta pase, que nun quedemos otra vegada ensin remembranza d’aquel “doloriu sentir”, el qu’amó la muerte y escribió versos con nomes de duelgu pa vengase del home onde habitaba.

Imprimir

L'Arribada (Per Asturies) llegaráse a Villaviciosa'l 21 de mayu

El viniente 21 de mayu, vienres, L'Arribada abre la estaya Per Asturies d'esta edición en Villaviciosa. Amás, esti añu, la presencia na capital maliaya va ser doble, en mayu y nel mes setiembre, previo al empiezu de la yá clásica Vagamar.

La xornada del día 21 d'esti mes entamaráse a comuna cola asociación La Compaña del Ronchel, como yá se ficiera en 2009. Les actividaes programaes son la proyección del documental L'últimu chalgueiru, del realizador Illán Gonzali y con guión d'Alberto Álvarez Peña; la presentación de la revista Atlántica XII y proyección del audiovisual Vallinaescura y homenaxe al gaiteru José Antonio Lozano.

D'equí a poco la organización dará más detalles sobro l'actu.
Imprimir

Yá se conocen les candidatures a los Premios Timón d'esti añu

Ayeri ciarró'l plazu de presentación de candidatures pa los Premios Timón que tán convocaos por L'Arribada dende mediaos del mes d’avientu pasáu .
Trátase del IV Premiu Timón, p’autores en llingua asturiana y n’eonaviego, y del I Premio Timón p’autores asturianos en castellanu. Pa esta edición, opten a los gallardones los y les escritores que nacieren nel añu 1960 o anteriormente.
P'alcordar el premiu, l’asociación va convocar dos xuraos, ún por cada modalidá, integraos por persones vinculaes a la cultura del país. Esta distinción, que consiste nuna obra del escultor y ceramista xixonés Jesús Castañón, va entregase durante la cellebración de L’Arribada 2010, dientro de la so estaya Vagamar, que va facese del 18 al 25 de setiembre.

Los candidatos definitivos son los que vienen darréu:

IV PREMIU TIMÓN, Pablo Ardisana, Manuel Asur, Roberto González-Quevedo y Miguel Rojo.

I PREMIO TIMÓN, Fulgencio Argüelles, Carlos Bousoño, Ángeles Caso, Luis Fernández Roces, Carmen Gómez Ojea, Carmen Ruiz-Tilve y Gonzalo Suárez.

Los ganadores anteriores fueron, en 2007, Nené Losada Rico, en 2008, Xuan Xosé Sánchez Vicente y, en 2009, Manuel García ‘El Galano’.
Imprimir

Nel primer actu de la Rolda 2010 debatieron representantes de los medios dixitales n'asturianu

D'izquierda a derecha, Félix Fernández, Fernando de la Fuente, Humberto Gonzali y Toño Martínez

La Rolda 2010, nueva estaya del ciclu cultural L'Arribada, entamó ayeri la so actividá con una mesa de debate sobro los diarios dixitales n'asturianu. L'actu, que se fizo nel xixonés Centru Municipal Integráu de L'Arena, cuntó cola participación de Toño Martínez (Infoasturies), Fernando de la Fuente (Asturies.com) y Félix Fernández (Aruelu.com), moderando'l coordinador de L'Arribada, Humberto Gonzali.

Próspero Morán (Asturnews) tuvo un impedimentu inaguardáu cuando taba llegando al Centru y nun pudo participar. Per otra parte, Les Noticies nun afayó a naide que pudiera asistir.

Pelo llargo del debate falóse de la historia de cada ún de los medios presentes y analizáronse custiones como la profesionalización de la xente que fai estos diarios, les polítiques d'ayudes y subvenciones xeneraes pola Alministración nesti campu, la publicidá, la información alternativo, el pesu de los llectores o l'aspectu normalizador de la prensa dixital n'asturianu, ente más otros.

Imprimir