 |
| Públicu asistente nel tendayu del Pueblu d'Asturies (Lujó Semeyes) |
Más de 5.000 persones averáronse al Muséu del Pueblu d'Asturies, en Xixón, col envís de ser partícipes na Primer sidre l'añu. Cola entrada, de 5 euros, los visitanes teníen drechu a asistir a los conciertos, exhibición de deportes tradicionales y esposiciones programaes, amás de a aquellos puestos 'sidreros' onde podíen degustar de baldre la más asturiana de les bebíes. Tamién podíen facese con un vasu de cristal comemorativu, con un costu de 1,5 euros, o con xarres de sidre tradicionales de cerámica feches en L.lamas del Mouro (Cangas del Narcea), por 10 euros.
Nel ámbitu musical, destacó la cellebración del certame ‘I Asturianada y sidre’, entamáu por Xosé María García ‘Llábana’ y pol musicólogu Llorián García, nel que participaron xente tan oldeada como Carlos Rubiera, Mari Luz Cristóbal o Anabel Santiago, y nuevos valores comu Raúl Díaz, Noemí Torrado o los hermanos Marisa y Fernando Valle que, inclusive, llegaron a componer dalgún tema dedicáu al festival.
La Fundación Asturies XXI y la revista La Sidra, organizadores de Primer sidre l’añu, calificaron esta edición del festival d'ésitu y esperen siguir cuntando col sofitu de la conceyalía de Cultura Tradicional y del Muséu del Pueblu d’Asturies, pa da-y continuidá a les xornes. Tamién agradecieron la collaboración de colectivos como Sidrastur, El Garrapiellu y l’Andecha de Folklore Tradicional La Deva, y de toles presones que ficieron posible col so trabayu'l bon desarrollu del festival. Dientro del separtáu d'agradecimientos, enfotáronse na presencia de los llagareros, que nesta ocasión espeyóse na participación de 60 llagares.
